aturuxo.

The W.A.B.

The W.A.B. nace cun obxectivo: ser un dúo demoledor.

Decepcionados coa escena actual do rock’n’roll, Drake Brenno e Aleksa Kaos deciden formar unha auténtica banda underground con influencias como Discharge, GG Allin ou Celtic Frost.

A música é a banda sonora da súa vida. Unha vida entre amplificadores, baterías e voces desgarradas que cada semana fan tremer as paredes dun garaxe apartado da gran cidade. Alí germina o que bautizaron como “Brutal-Punk”, un estilo cru que mestura a sinxeleza do punk clásico coa contundencia do metal.

Entre esas paredes, eles mesmos gravaron o que será o seu primeiro disco, que irán lanzando durante 2018. Odio, violencia, alienación humana e ataques á escena do rock son a columna vertebral dun traballo visceral.

A filosofía DIY (‘faino ti mesmo’) é moi importante para a banda: ademais de gravar os seus discos, crean o seu propio merchandising, organizan as súas xiras… todo desde unha estrita ética de autosuficiencia.

Cualificados como “os White Stripes do punk”, en directo son unha apisoadora sónica de riffs, berros e suor que cada día recruta máis seguidores á súa crecente comunidade de wabbers.

O rock’n’roll é estrada e o seu formato dúo permítelles viaxar con total liberdade. O seu próximo obxectivo é virar por toda Europa, á vez que seguen traballando en novas cancións.

Compoñentes:

• Drake Brenno (batería e voz)
• Aleksa Kaos (guitarra e voz)

Argallada

Da fusión entre un aborto de mexillón e un percebe xorde… Argallada! Unha mestura de punk old school con arranxos infernais desde o Morrazo. Temas curtos, mala hostia e a broma como forma de vida, que é o que nos mantén en pé despois de varios anos dando concertos e uns cantos cambios de formación. Facemos música para divertirnos e para cagarnos en todo. Somos pastafaristas e adoramos en segredo ao todopoderoso dinoseto.